Prajakta Gavhane's Lyrics
Tanda Chalalaa / तांडा चालला
आज इथे तर उद्या तिथे ! वणवण चालूच आहे पोटाची खळगी भरण्यासाठी विंचवाच्या पाठीवरही बिऱ्हाड आहे ! रूणझुणत्या पावलांनी दूरवर घुंगरांचा आवाज घुमतोय, पोरी-बाळी - मायलेकी... आडोशाला संगव्याच्या सारा संसारच बैलगाडीत मावतोय ! अंगावरच्या वेडया वाकडया लक्तरांनी लाज कधीच फाडून टाकली आहे... कारभारीही अनवाणीच... गरीबीवर आसूड तेवढा ओढतो आहे ! दूरदूर माळरानावर तांडा चालला आहे ! ही भटकंती अशीच चालू रहाणार जोवर मिळत नाही निवारा.. दूरवर कुठेतरी म्हणे वसंत फुलतोय.. इथे मात्र कायमचाच वैशाखवणवा ! इथली चूल सरपण असूनही विझली आहे... पेटणार तरी कशी? ...विस्तव नको? राखेच्या आडोशाला आतल्याआत निखारा तेवढा धुमसत आहे ! कसा का असेना, झगडत-पेटत-विझत-बुझत... ग्रीष्मातही दूर दूर... तांडा चालला आहे चाकं निखळंतच आली आहेत म्हणा, आऱ्या तेवढया शाबूत आहेत ! जुना कारभारी जाणार... नवीन वाटाडया तयारच आहे ! वर्षामागून वर्ष ही नुसतीच सरत जाणार... आडवळणाच्या जुन्या वाटा दिसेनाशा होणार... अंधारातच गाव कुठंतरी ठिपका होऊन रहाणार ! प्रकाशाची चलती होणारच... जरी दिसेनाशा झाल्या दिशा ! कुणास ठाऊक पुढे काय... आशा ! आशा ! नि फक्त आशा गरीबी काही केल्या सुटत नाही... नव्हे सोडतच नाही ......की सोडवत नाही ? खरं खोटं देवासच ठाऊक, कोडं कधी उलगडतच नाही ! फड ऊठू लागलेत आता... म्हणजे तुटूच लागलेत म्हणा ना! राहुटीचा काळदेखील संपला! संपवला!! वैशाख-वणवा सरत चालला... कारभारी परतीचा वेध घेऊ लागला... पुन्हा नव्या दमानं शिड ऊभारू लागला ! पुन्हा एकदा माळरान ओसाड भकास भासणार... दिव्यालाही कधीतरी प्रकाशाचं स्वप्नं पडणार ! अनवट वाटा रित्या होणार... गरीबीशी लढा चालूच रहाणार... अगदी निकराचा ! माहीत नाही... माहीत नाही कोण हरणार?... कोण जिंकणार?? वणवण तोवर चालूच राहाणार... जुन्याच वाटांनी ... पुन्हा पुन्हा एकाकी... तांडा चालतच रहाणार...
Additional Information
गीतकार : शंकर जांभळकर , अभिवाचन: डॉ. अमोल कोल्हे, संगीतकार : तेजस चव्हाण, गीत संग्रह/चित्रपट : कण्हेरीची फुले (२०१२) / Lyricist : Shankar Jambhalkar, Narrator : Dr Amol Kolhe, Music Director : Tejas Chavhan, Album/Movie : Kanherichi Phule (2012)