Sagara Pran Talmalala / सागरा प्राण तळमळला

ने मजसी ने परत मातृभूमीला
सागरा, प्राण तळमळला

भूमातेच्या चरणतला तुज धूता, मी नित्य पाहिला होता
मज वदलासी अन्य देशी चल जाऊ, सृष्टिची विविधता पाहू
तइं जननीहृद् विरहशंकीतहि झाले, परि तुवां वचन तिज दिधले
मार्गज्ञ स्वये मीच पृष्ठि वाहीन, त्वरित या परत आणीन
विश्वसलो या तव वचनी मी
जगद्नुभवयोगे बनुनी मी 
तव अधिक शक्त उद्धरणी मी
येईन त्वरे, कथुन सोडिले तिजला
सागरा, प्राण तळमळला

शुक पंजरी वा हरिण शिरावा पाशी, ही फसगत झाली तैशी
भूविरह कसा सतत साहु यापुढती, दशदिशा तमोमय होती
गुणसुमने मी वेचियली या भावे, की तिने सुगंधा घ्यावे
जरि उद्धरणी व्यय न तिच्या हो साचा, हा व्यर्थ भार विद्येचा
ती आम्रवृक्षवत्सलता रे
नवकुसुमयुता त्या सुलता रे
तो बाल गुलाब ही आता रे
फुलबाग मला हाय पारखा झाला
सागरा, प्राण तळमळला

नभि नक्षत्रे बहुत एक परि प्यारा, मज भरतभूमिचा तारा
प्रासाद इथे भव्य परि मज भारी, आईची झोपडी प्यारी
तिजवीण नको राज्य, मज प्रिय साचा, वनवास तिच्या जरि वनीचा
भुलविणे व्यर्थ हे आता रे
बहु जिवलग गमते चित्ता रे
तुज सरित्पते जी सरिता रे
तद्विरहाची शपथ घालितो तुजला
सागरा, प्राण तळमळला

या फेनमिषें हससि निर्दया कैसा, का वचन भंगिसी ऐसा
त्वत्स्वामित्वा सांप्रत जी मिरवीते, भिऊनि का आंग्लभूमीते
मन्मातेला अबल म्हणुनि फसवीसी, मज विवासनाते देशी
तरि आंग्लभूमि भयभीता रे
अबला न माझी ही माता रे
कथिल हे अगस्तिस आता रे
जो आचमनी एक क्षणी तुज प्याला
सागरा, प्राण तळमळला 

Ne majasi ne parat maatribhumila
Saagara, praan talamalala

Bhumaatechya charanatala tuj dhuta, mi nity paahila hota
Maj wadalaasi any deshi chal jaau, srishtichi wiwidhata paahu
Tin jananihrid wirahashnkitahi jhaale, pari tuwaan wachan tij didhale
Maargajnj swaye mich prishthhi waahin, twarit ya parat anin
Wishwasalo ya taw wachani mi
Jagadnubhawayoge banuni mi 
Taw adhik shakt uddharani mi
Yein tware, kathun sodile tijala
Saagara, praan talamalala

Shuk pnjari wa harin shiraawa paashi, hi fasagat jhaali taishi
Bhuwirah kasa satat saahu yaapudhati, dashadisha tamomay hoti
Gunasumane mi wechiyali ya bhaawe, ki tine sugndha ghyaawe
Jari uddharani wyay n tichya ho saacha, ha wyarth bhaar widyecha
Ti amrawrikshawatsalata re
Nawakusumayuta tya sulata re
To baal gulaab hi ata re
Fulabaag mala haay paarakha jhaala
Saagara, praan talamalala

Nabhi nakshatre bahut ek pari pyaara, maj bharatabhumicha taara
Praasaad ithe bhawy pari maj bhaari, aichi jhopadi pyaari
Tijawin nako raajy, maj priy saacha, wanawaas tichya jari wanicha
Bhulawine wyarth he ata re
Bahu jiwalag gamate chitta re
Tuj saritpate ji sarita re
Tadwirahaachi shapath ghaalito tujala
Saagara, praan talamalala

Ya fenamishen hasasi nirdaya kaisa, ka wachan bhngisi aisa
Twatswaamitwa saanprat ji mirawite, bhiuni ka anglabhumite
Manmaatela abal mhanuni fasawisi, maj wiwaasanaate deshi
Tari anglabhumi bhayabhita re
Abala n maajhi hi maata re
Kathil he agastis ata re
Jo achamani ek kshani tuj pyaala
Saagara, praan talamalala